Breaking the Box
Partneriaeth ledled Cymru yw Breaking the Box, wedi’i hariannu gan Brosiect Cysylltu a Ffynnu Cyngor Celfyddydau Cymru.
Y partneriaid yw: Theatr Taking Flight, Hynt, Disability Arts Cymru, Theatrau Sir Gâr, Pontio a Theatrau RhCT.
Mae Breaking the Box yn datblygu rhwydwaith o leoliadau perfformio cynhwysol a hygyrch yng Nghymru, sy’n hyderus ac yn derbyn cefnogaeth i groesawu artistiaid, aelodau criw y tu ôl i’r llwyfan, staff gweinyddol a chynulleidfaoedd amrywiol. Mae’r prosiect yn cynnig hyfforddiant a chymorth i egin-weithwyr theatr Byddar ac anabl trwy gyfrwng y rhaglen ar gyfer Pobl Greadigol ar Drothwy Eu Gyrfa (PGDEG); mae’n gweithio at ymgorffori rolau ar gyfer pobl greadigol Fyddar ac anabl mewn canolfannau perfformio yng Nghymru yn y dyfodol, gan ail-ddychmygu’r gweithlu creadigol. Rydyn ni’n ymdrechu i sefydlu meincnod i Gymru yn nhermau pa mor bell yr ydyn ni wedi cyrraedd o ran arferion cynhwysol a rhwyddfynediad yn ogystal â chydrannu gwersi’r prosiect ar draws y sector yng Nghymru ac ymhellach draw.
Yn ystod y gwaith yma rydyn ni wedi gweithio gyda’r Wneuthurwraig Theatr a’r hwylusydd Fyddar Mary-Jayne Russell de Clifford a hithau’n Rheolwraig Prosiect ar gyfer Rhaglen y PGDEG sy’n cynnig cyfleoedd lleoliadau gwaith, cefnogaeth a rhwydweithio i Emily Rose Corby a Mason Lima, dwy o bobl greadigol ar drothwy eu gyrfa gyda Breaking the Box. Yn ogystal rydyn ni wedi cynorthwyo Emily, Mason a phobl greadigol Fyddar ac anabl eraill ar drothwy eu gyrfa i fynychu Gŵyl Caeredin ynghyd â rhoi iddynt gyfleoedd i hyfforddi a lleoliadau gwaith. Gyda’r Ddr Louise Fryer, rydyn ni wedi hyfforddi carfan o ddisgrifwyr sain newydd yng Nghymru, gan gynnwys rhai sy’n gallu gweithio trwy gyfrwng y Gymraeg. Mae’r staff i gyd yn lleoliadau perfformio’r bartneriaeth wedi derbyn hyfforddiant mewn ymwybyddiaeth o Fyddardod ac Anabledd.
A ninnau wedi gweithio gyda’n gilydd dros y ddwy flynedd ddiwethaf hyn i ddatblygu’r rhaglen arloesol hon, rydyn ni’n falch dros ben i dderbyn rhagor o gyllid sy’n ein galluogi ni i barhau i ddatblygu’r gwaith yma dros y ddwy flynedd nesaf. Dros y cyfnod yma byddwn ni’n gweithio gyda’n partneriaid blaenorol ynghyd â phedwar partner llawrydd anabl â phrofiad bywyd ac ymarfer creadigol. Fe fydd un cudd-gynhyrfydd Byddar, anabl neu niwroamrywiol yn cael ei leoli ym mhob lleoliad perfformio, gan gadw rhwyddfynediad ar yr agenda, â’r nod o bryfocio a herio’r ffyrdd arferol o weithio, darganfod cyfleoedd ar gyfer Pobl Greadigol ar Drothwy Eu Gyrfa (PGDEG) a sicrhau cefnogaeth iddyn nhw. Bydd yna raglen 12 mis ar gyfer pedwar o PGDEG y tu ôl i'r llwyfan gan gynnwys cyfleoedd i hyfforddi gyda chyflog, a bwrsari hyfforddi lle gall pump actor fynd i’r afael â’r prinder perfformwyr anabl a Byddar.
I ddathlu diwedd cyfnod cyntaf y prosiect, byddwn ni’n cynnal diwrnod cydrannu ddydd Mercher 24ain Mai yn Theatr y Ffwrnes, Llanelli.
Ymunwch â ni yno i glywed sut daethon ni at y prosiect ac am yr hyn rydyn ni wedi’i ddysgu ar gyfer cyfnod nesaf Breaking the Box.
Theatr Taking Flight
Canolfan y Celfyddydau Chapter
Stryd Y Farchnad
Canton, Cardiff, CF5 1QE
029 2023 0020
Mae’r Theatr Ieuenctid yn cwrdd yng:
University of South Wales
86-88 Adam St
Cardiff CF24 2FN
Members of:
Cylchlythyr
Cyfrannwch arian
Cefnogwch Taking Flight trwy rodd hael. Cewch gyfrannu’n ddiogel trwy ein gwefan (isod), neu anfonwch siec yn daladwy i Taking Flight Theatre. (Os ydych chi’n talu trethi yn y DU, cliciwch ar yr opsiwn Rhodd Cymorth wrth roi ar-lein). Diolch!
